Фарғона.Ру - Ахборот агентлиги

Ўзбекистон иқтисодий жиноятларда айбланган бир гуруҳ турк тадбиркорларини мамлакатдан ҳайдаб чиқарди

Фарғона.Ру АА — Wed, 22 Feb 2012 17:01:05 +0300

Туркиянинг саккиз нафар фуқароси Ўзбекистондан депортация қилинди, дея хабар беради Озодлик радиоси Ўзбекистон давлат телеканалига ишорат билан. Депорт қилинганларнинг бари Ўзбекистонда “даромадни солиқдан яширганлик ва яширин иқтисодиёт яратганлик” учун жазога тортилиб, уларга тегишли мол-мулк мусодара қилинган. Бироқ тадбиркорлар дарҳол амнистия қилиниб мамлакатдан чиқариб юборилган. Ўзбекистонда яшашга рухсати бўлган яна бир турк тадбиркори уч йилга озодликдан маҳрум қилиниб, 15 минг АҚШ доллари миқдорида жаримага тортилган. Жазоланган шахсларнинг аксари солиқ, милиция ва хавфсизлик кучлари томонидан ўтган йил март ойида Тошкентдаги энг йирик Turkuaz супермаркетида ўтказилган рейд натижасида қўлга олинган. Бундан бир неча ой муқаддам, 2010 йилнинг охирида Ўзбекистон пойтахтида туркларга қарашли “Демир” супермаркети ҳам кўплаб қонунбузарликларни содир этгани боис ёпилганди. ”Фарғона” ахборот агентлиги

Ўзбекистонда арақ ва коньяк ишлаб чиқариш ҳажми кўтарилди

Фарғона.Ру АА — Wed, 22 Feb 2012 15:32:00 +0300

Ўтган йили Ўзбекистонда 11,3 миллион декалитр арақ ва бошқа спиртли ичимлик маҳсулотлари ишлаб чиқарилди. Бу кўрсаткич 2010 йилга қараганда 5,6 фоизга кўпроқ, дея хабар беради Podrobno.uz. Сўнгги етти йил давомида Ўзбекистонда ароқ ва спиртли ичимлик маҳсулотлари ишлаб чиқариш деярли икки баробарига ошиб кетди. Мисол учун, 2005 йилда 5,93 миллион декалитр алкоголь маҳсулотлари ишлаб чиқарилган. Коньяк ишлаб чиқариш ҳажми ҳам кўтарилди: 2011 йилда 95,8 минг декалитр тайёрланган, бу ўтган йилги кўрсаткичларга қараганди 25 фозга кўпроқ. Podrobno.uz. маълумотига кўра, айни пайтда “Ўзвиносаноат-холдинг” компаниясининг қуввати 10 миллион декалитр ликер-ароқ маҳсулотлари, 5 миллион декалитр этил спирти, 150 минг декалитр бренди ва коньяк, 15 миллион декалитр узум виноси, 10 миллион шишада шампанский ва вижжилайдиган вино ишлаб чиқаришга ҳамда 250 минг тонна узумни қайта ишлашга имконият беради. Шунга қарамай, Ўзбекистонда 2012 йил 1 январида алкогол маҳсулотларига (пиводан ташқари) улгуржи ва чакана савдо нархлари кўтарилди. ”Фарғона” ахборот агентлиги

2011 йилда 160 мингдан зиёд ўрта осиёликлар Россияга кўчиб кетдилар

Фарғона.Ру АА — Wed, 22 Feb 2012 13:36:00 +0300

Коммерсантъ нашри хабар беришича, Росстат 2011 йил якунлари бўйича демографик маълумотларни эълон қилди. Россиянинг бош статистик идораси 2011 йилда бошлаб мамлакатга 9 ойдан ошиқ вақтга келганларни статистик маълумотларда доимий яшовчи сифатида қайд эта бошлаган. Маълумотга кўра, Россия Федерациясида 3,4 миллионга яқин киши доимий яшаш жойларини ўзгартирган, улардан 3,05 миллиони Россия ичида кўчиб юрган. Россия Федерациясига 356,2 минг мигрант келган ва 36,4 минг киши мамлакатни тарк этган. Шундай қилиб, Россия Федерациясида ташқи муҳожирлик ўсиши 289 минг кишини ташкил этган, бу мамлакатнинг қисқарган аҳолиси сонидан икки баробар кўп. Росстат қайд этишича, Россия Федерациясининг доимий аҳолиси сонининг умумий ўсиши 189 минг кишини ташкил этган, мамлакат аҳолиси сони 143 миллион кишидан иборат. Халқаро миграция 2009 йил даражасига етди. Росстат маълумотига кўра, аҳоли ўсишига энг катта ҳисса қўшган Ўзбекистон бўлди. Бу мамлакатдан Россияга 62,5 минг киши кўчиб келган. Шунингдек, 2011 йилда Қирғизистондан 40,7 минг киши, Тожикистондан – 34,1 минг киши, Арманистондан - 31,7 минг киши ва Қозоғистондан 30,4 минг киши кўчиб келган. ”Фарғона” ахборот агентлиги

Журналистларни ҳимоя қилиш қўмитаси: Ўзбекистон қамалган журналистлар бўйича минтақада биринчи ўринга чиқиб олди

Фарғона.Ру АА — Wed, 22 Feb 2012 12:43:00 +0300

Журналистларни ҳимоя қилиш қўмитаси (ЖҲҚ) томонидан 21 февраль куни чоп этилган йиллик “Матбуотга ҳужум” шарҳи маълумотига кўра, жазони ўташ муассасаларида беш нафар журналистни сақлаётган Ўзбекистон қамоқдаги ёзувчилар сони бўйича минтақада биринчи ўринга чиқиб олган. Ўзбекистон, шунингдек, мамлакатдан қочишга мажбур бўлган журналистлар сони бўйича дунё ўнталиги мамлакатлари орасидан жой олган: ЖҲҚ маълумотига кўра, сўнгги 10 йил давомида кам деганда 18 нафар журналист таъқиб ва қамалиш таҳдидлари боис мамлакатни тарк этишга мажбур бўлганлар. Бундан ташқари, Ўзбекистон расмийлари Интернетнинг араб инқилобларида ролини англаган ҳолда, мамлакат ичида блокировка қилинган сайтлар рўйхатини кенгайтирди ҳамда ўзбек доменига кирувчи сайтларни цензура қилиш учун давлат комиссиясини тузди, дея қайд этади ЖҲҚ. ЖҲҚ маълумотига кўра, 2011 йил 1 декабргача бўлган маълумотга кўра, Қозоғистонда битта журналист турмада ўтирган. Қирғизистонда 2011 йилда журналистларга 8 марта ҳужум қилинган. 1 декабргача бўлган маълумотга кўра, қамоқда битта журналист ўтирган. Ўтган йили Қирғизистонда цензура кучайиши, зўравонликлар ўсиши ҳамда сиёсий сохталаштирилган суд процесслари сонининг кўпайиши қайд этилган. Мамлакат парламенти давлат идораларига танқидий кайфиятдаги “Фарғона” веб-сайтини ёпиб қўйишни буюрди. Расмийлар миллати ўзбек бўлган икки ОАВ эгасига қарши экстремизмда айблов қўйиб, уларга тегишли медиакомпанияларни тортиб олди, шундан сўнг улар мамлакатни тарк этишга мажбур бўлдилар. ”Фарғона” ахборот агентлиги

Россия: Москвада пичоқдан яраланган Ўзбекистон фуқароси касалхонага етказилди

Фарғона.Ру АА — Wed, 22 Feb 2012 12:38:01 +0300

20 февраль куни пичоқдан яраланган Ўзбекистон фуқароси оғир аҳволда касалхонага ётқизилди. Бу ҳақда Эхо Москвы радиоси Интерфакс агентлигига ишорат билан хабар берди. Полиция идораларидаги манбага кўра, 25 ёшли йигит пойтахтнинг Раменки райони Довженко кўчасидаги 4 уйнинг ёнида, озиқ-овқат дўконининг орқасида топилган. Ҳодиса содир бўлган ерга етиб келган “Тез ёрдам” шифокорлари йигитнинг баданига етти марта пичоқ урилганини аниқладилар. Ҳодиса содир бўлган ерда оператив-тергов гуруҳи ишлаяпти ҳамда ҳодиса тафсилотларини ўрганаяпти. ”Фарғона” ахборот агентлиги

Қирғизистон: Президент Алмазбек Атамбаев фазогир Солижон Шариповни Ўш тартибсизликларини уюшитиришда иштирок этган дея гумонлаяпти

Фарғона.Ру АА — Mon, 20 Feb 2012 17:41:02 +0300

Солижон Шарипов ва Алмазбек Атамбаев, июнь 2007 йил

Вечерний Бишкек газетаси ёзишича, Қирғизистон президенти Алмазбек Атамбаев 17 февраль куни Ўш Давлат университети жамоаси билан учрашув чоғида “Қирғизистоннинг биринчи фазогири Солижон Шарипов Ўш воқеаларини уюштиришга алоқадор бўлиши эҳтимоли бор”, дея билдирган. “Қодиржон Ботировга қарашли мулкнинг бир қисми космонавт Солижон Шариповнинг номига ўтказилибди. Шарипов ўтган сайловда кимларни ташвиқот қилганини биласизлар. Қирғизистонни бўламан, у қиламан, бу қиламан, деган кишини ташвиқот қилиб юрди. 2010 йили ҳам шундай бўлган. Булар ўз мақсадлари учун жанубнигига эмас бутун Қирғизистонни йўқ қилиб юборишга тайёр одамлардир. Бундайлар кўп. Ҳаммасини текширамиз. Менга ишонаверинг”, - дея Атамбаевнинг сўзларидан иқтибос келтиради Озодлик. Эслатиб ўтамиз, Қирғизистон жанубидаги ўзбеклар етакчиси Қодиржон Ботировнинг мулки масаласи 2012 йил 2 февраль куни парламент мажлисида кўтарилган. Хусусан, отамакончи Ақунали Дўсалиев “Ботировга қарашли мулкдан 26 та объект нега космонавт Солижон Шарипов номига ўтказиб берилган?” дея қизиққанди. Республика бош прокурори Аида Салянова шундай маълумотга эгалигини тасдиқлади ҳамда Ботировга қарашли мулкдан 20 дан ошиғи ҳибсга олинганини, бош прокуратура керак бўлса Шариповни сўроқ қилажагини қўшиб қўйди. Солижон Шарипов айни пайтда Россия Ҳарбий-Ҳаво Кучларининг космонавти. У Ўзган шаҳрида туғилган, ҳам қирғизистонликлар, ҳам ўзбекистонликларнинг ғурури саналади. Қодиржон Ботиров – Қирғизистондаги ўзбеклар жамоасининг етакчиларидан бири, Жалолобод шаҳрида хусусий университет ташкил этган, парламентнинг собиқ депутати, 2-чи даражали Давлат маслаҳатчиси. Қирғизистон жанубида 2010 йилда содир бўлган оммавий тартибсизликларни уюштиришда айбланиб, сиртдан умрбод қамоқ жазосига ҳукм этилган. Айни пайтда Швецияда сиёсий бошпана топган. ”Фарғона” ахборот агентлиги

Ўзбекистон: Сурхондарё вилоятида бир маҳалладан қирқ киши ҳибсга олиниб калтакланди

Фарғона.Ру АА — Mon, 20 Feb 2012 16:49:04 +0300

Миллий хавфсизлик хизматининг Термиз шаҳар бошқармаси ходимлари 8 февраль куни Сурхондарё вилояти Сариосиё тумани “Ғалаба” маҳалласидан 40 кишини қўлга олиб кетди. Бу ҳақда Ўзбекистон Мустақил ҳуқуқ ҳимоячилари ташаббус гуруҳининг (ЎМҲҲТГ) раиси Сурат Икрамов маълум қилди. Унга кўра, шу кунларда ташкилотга 97 ёшли Нисбатулло хожи Нуров мурожаат қилиб, 8 февраль тунида, соат учда унинг уйига қўлида автомати билан ниқобли ва камуфляж форма кийган 25 киши бостириб кирган. Улар ўзларини таништирмадилар ва бостириб келиш сабабини тушунтирмадилар. Уйда тинтув ўтказдилар, тақиқланган ҳеч нарса топа олмай “Қуръон” ва тўй-тантаналар ёзилган бир неча дискларни олиб чиқиб кетдилар. Улар ҳеч нарса тушунтирмай Нисбатулло хожининг ўғилларини: 1972 йиллда туғилган Сайфуллони, 1968 йлда туғилган Саъдуллони, 1975 йилда туғилган Абдуллони ҳамда 1978 йилда туғилган невараси Искандарни ва икки қўшнилари: 1979 йилда туғилган Хожиакбар давлатовни ва 1960 йилда туғилган Иноқ хожи Сувоновни олиб кетдилар. Улардан ташқари, “Ғалаба” маалласининг яна 30 нафар фуқароси ҳам СНБ ертўласига олиб кирилган. Икрамовга кўра, юқорида номи келтирилган фуқароларга қарши кўрсатма олиш мақсадида уларни калтаклаб, қийнаганлар, аммо эртаси куни қўйиб юборганлар. Ҳамқишлоқлар қандай кўрсатма беришлари керак бўлгани ҳақида маълумот берилмаган. Нисбатулло хожининг бошқа ўғли Неъматулло 9 февраль куни Миллий хавфсизлик хизмати бошқармасига мурожаат қилиб, ака-укаларининг тақдирини билмоқчи бўлган. ЎМҲҲТГ маълумотига кўра, МХХ ходимлари Неъматуллони ҳам калтаклаб, қайта бу ерга келмаслик шарти билан қўйиб юборганлар. Ҳибсга олинганлар Термиз шаҳар МХХ тергов изхоляторида сақланмоқдалар. Адвокатлар ва яқин қариндошлар уларнинг ёнига йўлатилмаяпти, ҳибсга олиниш сабаблари айтилмаяпти. ”Фарғона” ахборот агентлиги

“Википедия”нинг ўзбекча версияси Ўзбекистонда очилмаяпти

Фарғона.Ру АА — Fri, 17 Feb 2012 18:02:02 +0300

“Википедия”нинг ўзбекча версияси Ўзбекистонда очтирилмаяпти Ўзбекистонда “Википедия”нинг ўзбекча версиясига тўсиқ қўйилди: uz.wikipedia.org сайтини очмоқчи бўлган Интернет-фойдаланувчилар www.msn.com сайтига тушиб қолаяпти. Ўзбекистонлик провайдерлар мамлакатда тўсиқ қўйилган сайтларга кирмоқчи бўлганларни одатда шу сайтга жўнатиб юборадилар. Айни пайтда сайтга фақат прокси-провайдерлар воситасида кириш мумкин. “Википедия”нинг ўзбек тилидаги бўлими 2004 йилнинг январида тузилган. 2012 йил 16 феврал ҳолатига кўра, сайтда 8528 нафар иштирокчи рўйхатдан ўтган, улардан тўрттаси администратор мақомига эга. Тил бўлимида 7884 та мақола жойлаштирилган. “Википедия” ўзбек тили бўлимининг сифат индекси 73,6 га тенг. alexa.com статистика маълумотига кўра, Википедия Ўзбекистон сайтлари орасида фойдаланувчилар кириши бўйича Mail.ru, Google.com, Яндекс.ru, Google.co.uz, Одноклассники.ru, Facebook.com, Google.ru, Torg.uz ва YouTube.com сайтларидан кейин тўққизинчи ўринни эгаллайди. Эслатиб ўтамиз, Ўзбекистонда 2005 йил 13 майда Андижонда содир бўлган фожиавий воқеаларидан сўнг ҳукумат учун нобақбул сайтларга тўсиқ қўйила бошланди. 2005 йилнинг ёзидан бошлаб республика ҳаёти ҳақида мунтазам ахборот бериб келадиган “Фарғона”, Uzmetronom.com, IWPR, Eurasianet.org, Би-би-си радиоси ҳамда кўплаб бошқа тармоқ оммавий ахборот воситалари, шунингдек, алоҳида ахборот агентликларининг Ўзбекистонга бағишланган мақолалари ўзбекистонлик фойдаланувчилар учун очилмайдиган бўлиб қолган. Тармоқдаги цензурани республика Миллий хавфсизлик хизматининг бевосита раҳбарлиги остида ишлаётган махсус гуруҳлар амалга оширадилар. ”Фарғона” ахборот агентлиги

Қирғизистон: Президент янги уйга кўчиб кираётган ҳуқуқ-тартибот идоралари ходимларини шахсан ўзи табриклади (фото)

Фарғона.Ру АА — Thu, 16 Feb 2012 20:53:02 +0300

Қирғизистон президенти Алмазбек Атамбаев Ўшда ҳуқуқ-тартибот идоралари ходимлари учун қурилган уйни топшириш маросимида қатнашди, дея хабар беради давлат раҳбари матбуот хизмати.
Ўшда қурилган уйлардан бири
Қиймати 220 миллиондан сомдан зиёд (5 миллион доллар атрофида) 60 хонадонлик уй Ўш ва Жалолобод шаҳарларини қайта ишлаш бўйича давлат дирекцияси буюртмаси билан қурилган. 24.kg ахборот агентлиги хабарига кўра, яна битта 75 квартирали уй эгаларига топширилган.
Уйни янги эгаларига топшириш маросими
Бинолар муҳандислик коммуникацияларига уланган. Икки уйнинг умумий майлдони 15 минг 449 квадрат метрга тенг. Уйларда 25 та бир хонали, 85 та икки хонали ва яна шунча уч хонали квартиралар бор.
Алмазбек Атамбаев ва Мелис Мирзақматов қизил лентани кесишаяпти
А. Атамбаев янги уй эгаларига хонадон калитларини топшириб, уй кўчди билан табриклади ҳамда ҳуқуқ-тартибот идоралари ходимлари учун уй қурилиши ишларини давом этишга ваъда қилди. Шундан кейин президент Ўш шаҳар ҳокими М. Мирзақматов билан қизил лентани кесиб янги хонадонларни кўздан кечирди.
Президент янги уйни кўздан кечирмоқда
Бундан ташқари, Алмазбек Атамбаев 2010 йил июнь фожеаси давомида ҳалок бўлган ва бедарак йўқолганларнинг яқинлари ва қариндошлари билан учрашди. У Бош прокуратурага ўша фожиани текшириш ва хронологиясини тиклаш бўйича топшириқ берганини маълум қилди.
Янги уйни топшириш маросимида
“Келгусида бундай воқеалар қайтарилмаслиги учун бўлиб ўтган ишларни синчковлик билан текшириш ва айбдорларни жазолаш лозим”, - дея билдирди Алмазбек Атамбаев. ”Фарғона” ахборот агентлиги

Покистон, Эрон ва Афғонистон президентлари Исломободда учрашдилар

Фарғона.Ру АА — Thu, 16 Feb 2012 18:50:02 +0300

2012 йил 16 февраль куни Исломободда (Покистон) Покистон, Эрон ва Афғонистон президентларининг икки кунлик саммити бошланди, дея хабар беради Свобода Радиоси (Озодлик радиоси рус тили хизмати). Саммитда терроризмга, наркотикларга ва одам савдосига қарши кураш олиб боришда биргаликда кўриладиган чоралар муҳокама қилинади. Учрашув Эрон билан Ғарб мамлакатлари ўртасидаги таранглик ўсиб бораётгани қабатида ўтмоқда. АҚШ президенти Барак Обама 5 февраль куни Эрон ядровий қуролга эгалик қилмаслиги учун қўлидан келганини қилажагини билдирди. Бунга жавобан Теҳрон “душман томонидан Ислом Республикасига ҳужум қилишга кўмаклашган ҳар қандай мамлакатнинг ҳудудига қарата жавоб зарбасини беражагини” эълон қилди. Эрон президенти Маҳмуд Аҳмадийнажод 15 февраль куни ядро дастурида эришган янги муваффақиятлари ҳақида эълон қилди ҳамда ғарб мамлакатлари санкциялар воситасида Эронни ядровий изланишлардан воз кечишга мажбур қила олмаганини билдирди. Эроннинг араб тилида кўрсатув олиб борадиган Al Alam TV телеканали хабар беришича, Теҳрон Европа иттифоқининг халқаро сиёсат бўйича комиссари Кэтрин Эштонга йўллаган мактубида Эрон ўзининг ядровий дастури бўйича очиқ ва конструктив музокара ўтказишга тайёрлигини билдирган. Исломободдаги саммит бошланган бир пайтда, АҚШ, Афғонистон ҳукумати ва “Толибон” ҳаракати вакиллари уч томонлама музокараларни бошлаганлари маълум бўлди, дея хабар беради Интерфакс. Музокаралар ҳақида Афғонистон президенти Хомид Карзай The Wall Street Journal газетасига сўзлаб берди. Музокара ўтказилаётган жой очиқланмаган. ”Фарғона” ахборот агентлиги

Ўзбекистон президентининг Киевга ташрифи тўғрисида келишувга эришилди

Фарғона.Ру АА — Wed, 15 Feb 2012 14:52:04 +0300

Украина ва Ўзбекистон ҳамкорликнинг янги поғонасига чиқиб олди. Бу ҳақда Украина ташқи ишлар вазирлиги спикери Александр Дикусаров брифингда қайд этиб ўтди, дея хабар беради Олам.Уз. Унга кўра, Украина ташқи ишлар вазири Константин Гришченконинг Ўзбекистон Республикасига ташрифи чоғида икки мамлакат муносабатларида жиддий силжишларга эришилди. Украина ташқи ишлар вазири Ўзбекистонга ташрифи чоғида мамлакат президенти Ислом Каримов, Олий Мажлис Сенати раиси Илгизар Собиров, ташқи ишлар вазири Абдулазиз Комилов, ташқи иқтисодий алоқалар, инвестиция ва савдо вазири Элёр Ғаниев билан учрашди. “Учрашув натижаларига кўра жорий йилда Ўзбекистон Республикаси президентининг Украинага ташрифи тўғрисида принципиал келишувга эришилди ҳамда Украина бош вазири Азаровнинг ҳар томонлама ҳамкорлик бўйича ҳукуматлараро комиссиянинг навбвтдаги мажлисини ўтказиш учун Ўзбекистон Республикасига ташрифи мақсадга мувофиқлиги қайд этилди”, - деди Дикусаров. Унга кўра, учрашув вақтида парламентлараро ҳамкорликни ҳам бошлаш зарурлиги тасдиқланди ҳамда Украина Олий Радаси раиси Литвиннинг мамлакатга расмий ташриф билан келишга таклифи Ўзбекистон Сенати раисига топширилди. У, шунингдек, томонлар тоғ-металлургия, энергетика каби соҳаларда ҳамкорликни кучайтириш, машинасозлик ишлаб чиқаришни модернизацияси ҳамда кимё саноати ва қишлоқ хўжалигида ҳамкорликни йўлга қўйишда Украинанинг фаоллашуви зарурлиги тўғрисида келишиб олинганини маълум қилди. ”Фарғона” ахборот агентлиги

Ўзбекистон: 2011 йилда МДҲ мамлакатлари билан ташқи савдо айланмаси 18,6 фоизга ўсди

Фарғона.Ру АА — Wed, 15 Feb 2012 09:10:00 +0300

Ўзбекистоннинг МДҲ мамлакатлари билан ташқи савдо айланмаси ўтган 2011 йилда 18,6 фоизга ўсиб, 11,11 миллард долларни ташкил этди, дея хабар беради REGNUM ахборот агентлиги республика Давлат статистика қўмитаси маълумотларига таянган ҳолди. Шу идоранинг маълумотига кўра, ўтган йил якунлари бўйича республиканинг ташқи савдо айланмаси 25,537 миллиард долларни ташкил этган (ўсиш 15 фоиз). Ўзбекистон ўтган йили МДҲ мамлакатларига 6,72 миллиард долларлик экспорт ва 4,39 милиард долларлик маҳсулот импорт қилган. Шу жумладан, Озарбайжон билан – экспорт: $34,1 млн, импорт: $26,1 млн., Арманистон - экспорт: $2 млн., импорт: $1,2 млн, Белоруссия - экспорт: $22 млн, импорт - $133,6 млн., Қозоғистон - экспорт: $1 млрд 673,2 млн., импорт: $1 млрд 097,6 млн., Қирғизистон - экспорт: $94,2 млн, импорт: $65,9 млн., Молдавия - экспорт: $21,5 млн., импорт: $5,7 млн., Россия - экспорт: $4 млрд 405,5 млн., импорт: $2 млрд 282,8 млн., Тожикистан - экспорт: $119 млн., импорт: $5,5 млн, Туркманистон - экспорт: $168,6 млн., импорт: $285,7 млн., Украина - экспорт: $180 млн., импорт: $485,9 млн. Шу билан бирга, Россия ўзининг савдо айланмасидаги улуши - 26,2% (ўсиш 8,9%), Қозоғистон – 10,9% (+47,1%), Украина - 2,6% (+18,3%) ва Туркманистон – 1,8% (+68,8%) билан Ўзбекистоннинг ташқи савдодаги ўнта энг йирик шериклари қаторига кирдилар. Бу рўйхатга, шунингдек, Хитой (10,2%, +18,9%), Жанубий Корея (6,4%, +0,4%), Туркия (4,7%, +22,8%), Афғонистон (3,1%, +21,8%), Германия (2,2%, +13,8%) ва Эрон (1,7%, -34,8%) кирган. Ўзбекистоннинг ташқи савдодаги мусбат сальдо 4,517 миллиард долларни, шу жумладан, МДҲ мамлакатлари билан -2,33 милиард долларни ташкил этди. ”Фарғона” ахборот агентлиги

Жаҳон банкининг Марказий Осиё бўйича янги минтақавий директори Ўзбекистонга ташриф буюради

Фарғона.Ру АА — Tue, 14 Feb 2012 19:59:05 +0300

Жаҳон банкининг Марказий Осиё бўйича минтақавий директори Сарож Кумар Жа Ўзбекистонга ташриф буюради. Ташриф 16-18 февраль кунлари Марказий Осиё мамлакатларига танишув сафари доирасида бўлиб ўтади, дея хабар беради anons.uz нашри. Сарож Кумар Жа бу лавозимга 2012 йилнинг 1 февралида янгидан тайинланган. Бунгача у Жаҳон банкининг табиий офатлар хавфини бошқариш бўйича Глобал раҳбар сифатида ва Глобал фонднинг табиий офатларни хавфини камайтириш ва тиклаш бўйича раҳбари лавозимида ишлаган. Қайд этиш жоиз, бундан олдин у бутун дунё бўйлаб табиий офатлар бўйича кўплаб халқаро тиклаш амалиётларини бошқарган, дея хабар беради CA-NEWS. Шунингдек у Жаҳон банкида бошқа раҳбар лавозимларда ҳам фаолият юритган, ҳинду, инглиз, араб, француз, майтхили, ория ва урду тилларида сўзлаша олади. Ҳиндистон Технология институтини тамомлаган. ЖБнинг минтақавий ваколатхонаси Қозоғистоннинг Алмати шаҳрида жойлашган. ”Фарғона” ахборот агентлиги

БМТ Бош котибининг муовини Ўзбекистонга ташриф буюради

Фарғона.Ру АА — Tue, 14 Feb 2012 19:22:01 +0300

Бирлашган Миллатлар Ташкилоти Бош котибининг муовини, Осиё ва Тинч океани учун Иқтисодий ва ижтимоий комиссияси (ОТОИИК) ижрочи котиби Ноилин Хейзер 14 февраль куни Тошкентга келди, дея хабар берадилар Ўзбекистон оммавий ахборот воситалари. ОТОИИК делегацияси Тошкентда 16-17 февраль куни ўтадиган “Зиёли ва интеллектуал жиҳатдан баркамол авлодни тайёрлаш – барқарор тараққиёт ва мамлакат модернизациясидаги муҳим омил” дея аталувчи халқаро анжуманда иштирок этади. Ўзбекистон ташқи ишлар вазирлиги матбуот хизматининг маълум қилишича, ташриф доирасида вазирлик ва маҳкамаларда расмий мулозимлар билан музокаралар ҳамда мамлакатнинг диққатга сазавор жойларини бориб кўриш режаланган. ”Фарғона” ахборот агентлиги

Ўзбекистон: Андижондаги кўп қаватли уйда газ баллон портлади, қурбонлар бор

Фарғона.Ру АА — Tue, 14 Feb 2012 13:44:00 +0300

13 февраль куни Андижонда кўп қаватли уйлардан бирида содир бўлган портлаш оқибатида кам деганда икки киши ҳалок бўлган ва яна бир нечтаси яраланган, дея хабар беради Uznews.net. Кечқурун соат 21 атрофида иккинчи микрайондаги №16 уй хонадонларидан бирида ёнғин бошланди. Дастлабки маълумотларга кўра, портлаш сабаби – овқат тайёрлаш ва уйни иситиш учун газ баллонидан фойдаланиш бўлиб қолди. Озодлик Радиоси маълумотига кўра, портлаш овози ҳодиса содир бўлган жойдан уч чақирим масофада ҳам эшитилган. Жабрланганлар ҳақидаги маълумотлар турлича. Озодлик бир киши - 35 ёшли Анвар Ражабовнинг жабрлангани ҳақида хабар бермоқда. Айни пайтда у куйишнинг 1-2 даражали тоифаси билан жароҳатланган ҳамда бош ва елка қисми 15 фоизга куйган. Унинг аҳволи оғир экани айтилди. Uznews.net шу ерда яшайдиган кишидан келтирган иқтибосда айтилишича, портлаш содир бўлган хонадонда эр-хотин ва учта боласи яшаган. Эр-хотин ҳалок бўлди, болаларнинг тақдири ҳақида ҳеч нарса маълум эмас. Баъзи маълумотларга кўра, улар касалхонага етказилган. Портлаш натижасида буйнинг биринчи ва иккинчи қаватидаги хонадонлар шикастланган. Воқеа шоҳидларига кўра, қўшни хонадонларда яшаган одамлар ҳам яраланган бўлиши мумкин. Озодлик портлашдан кейин уйнинг ён томонидаги бетон девор қулагани ҳақида хабар берган. Ҳодиса содир бўлган жойга етиб келган фавқулодда вазиятлар бошқармаси ходимлари ва ўт ўчирувчилар уйда яшовчи барча одамларни хавфсиз жойга кўчиришган. Қизиғи шундаки, ўт ўчирувчилар кетганидан сўнг уйнинг 3 ва 4 қаватида яна ёнғин бошланган. Айни пайтда уй милиция ходимлари томонидан қуршаб олинган.
“Фарғона” аввал ҳам Ўзбекистонда жиддий энергетик таназзулни бошидан кечираётгани ҳақида ёзган. Андижонда табиий газ йўқ ҳисобида, электр энергияси график бўйича узатилаяпти, электр энергияси ҳатто туғруқхона ва болалар касалхоналарида ҳам етишмаяпти. Чақалоқлар совуқдан ўлиб қолаётгани ҳақида маълумотлар келаяпти. Одамлар уйларини ўтин, тезак ва кўмирда иситишга мажбур бўлаяптилар. Ис газидан ўн етти ёшли қизнинг вафот этгани ҳақида хабар берилганди. Мана энди навбатдаги яна бир фожиа. Эслатиб ўтамиз, Андижонда газ таги йўқлиги туфайли узиб қўйилмаган. Чет элга сотилаётган газ ҳажми мунтазам равишда ўсиб бораяпти. Бундан фақат давлат раҳбарлари фойда кўраяптилар. Уларнинг оддий одамлар билан асло иши бўлмай қолган. ”Фарғона” ахборот агентлиги

Ўзбекистоннинг расмий ОАВ нега ёлғон сўзларни очиқдан-очиқ, баландпарвоз руҳда ёзадилар?

Фарғона.Ру — Wed, 22 Feb 2012 10:02:00 +0400

Ўзбекистоннинг бош ахборот агентлиги хоҳишидаги нарсани бор қилиб кўрсатиш илинжида иқтибослари келтирилаётган нотиқларга йўқ мақомларни бериб, ўз ўқувчиларига ёлғон маълумотларни тақдим этмоқда

Уч кишидан ортиқ тўпланмасин. Ўзбекистонда Хэллоуин, флешмоб ва City Quest тақиқланди

Фарғона — Thu, 16 Feb 2012 15:42:00 +0400

Бир неча йил муқаддам Тошкентда турлича кўнгилочарликлар кенг урф бўлгани кўпчиликнинг ёдида. Бироқ ўтган йилнинг октябрида миршаблар шаҳарликларнинг Хэллоуин байрамини нишонлашларига тўсқинлик қилдилар, кўча байрамининг барча иштирокчиларини милиция маҳкамаларига олиб кириб қўйдилар. Шу йил февраль ойида эса флешмоберларнинг сайти ёпиб қўйилди. Умумий ғоя остида билашган кўплаб одамларнинг исталган вақтда ва исталган жойда тўпланишлари мумкинлиги махсус хизмат ходимларини ҳаддан зиёд хавотирга солиб қўйди. Ёшларнинг кўнгилочар ўйинлари сиёсатга ҳеч қандай алоқаси йўқлиги ҳамда жамоат хавфсизлигига ҳеч қандай таҳдид солмаётгани эса улар учун аҳамиятсиз

Ўзбекистон: Ислом университетининг талабаси порахўр уламоларга ем бўлди

Фарғона.Ру — Wed, 15 Feb 2012 18:09:00 +0400

Тошкентдаги Ал-Бухорий номидаги Ислом университетининг талабаси 2012 йил январининг охирида калтакланди. Номаълум кимсалар унинг бўғзига пичоқ тираб “икки кун ичида Тошкентни тарк этишни ҳамда институт раҳбарияти устидан асло шикоят қила кўрмаслигини” талаб қилдилар. Талаба билан институт ўртасидаги қарама-қаршилик шу тарзда ниҳоясига етди: 2009 йилда институтга кириш учун пора берди, аммо абитуриент берган пул ректорнинг чўнтагига етиб бормай, йўлда “гумдон бўлди”. Ҳуқуқ ҳимоячилар бу воқеа билан қизиқиб қолдилар. Аммо Ўзбекистон Мусулмонлар диний бошқармасидаги диндор мутасаддилар бу каби қонунбузарликларга панжа ортидан қарар эканлар

Ўзбекистон: “Хип-хоп” услубидаги можаро

Александр Бенуа — Mon, 13 Feb 2012 14:15:00 +0400

2012 йил бошида Ўзбекистоннинг Чирчиқ шаҳрида ўзбек ва қозоқ ёшлари ўртасида можаро содир бўлди. “Фарғона” мухбири Чирчиқ шаҳрига бориб, можаронинг тафсилотларини ҳамда ўспиринлар ўртасидаги миллий қарама-қаршилик сабабини аниқлаб келди. Ҳаммасига маҳаллий политехника коллежи талабаларидан бири томонидан ёзиб олинган ва тарқатилган қўшиқ айбдор бўлиб чиқди. Шунингдек, ўспиринлар қарама-қарши томонга фақат ўқишда “бўлинишлари”, уйда ва ўқув муассасидан ташқарида эса дўстона муносабатда эканлари аниқланди. Ўқитувчларга ва милиционерларга раҳмат: айнан уларнинг ўз вақтида зарур чора кўрганлари боис миллий негиздаги қарама-қаршилик авж олмай қолди

Мамут Чурлунинг “Лойга битилган назми” (1974-1989 йиллар слайдлари бўйича)

Фарғона — Thu, 02 Feb 2012 06:48:00 +0400

“Ўрта Осиёда инсон бешикдан то қабргача лой-турпоқ билан овора. Боқадигани ҳам, иситадигани ҳам, совуқдан, жазирама иссиқдан, қор-ёмғирдан авайлаб асрайдигани ҳам лой-тупроқ. Қаёққа қараманг, лой-тупроққа кўзингиз тушаверганидан, сизни қуршаб турган ҳаво сингари одатий бўлиб қолган. Агар фалакнинг гардиши бир айланиб, қўққисдан лой йўқ бўлиб қолса, Шарқ тамаддуни учун қандай улкан оқибатларни олиб келишини тасаввур ҳам қилиб бўлмайди. Аммо Осиёнинг миннатдор халқи номидан лойга ёдгорлик ўрнатишга зарурат йўқ. Уни куйларга солиб қўшиқ куйланмайди, назмга солиб шеърлар тўқилмайди. Чунки унинг ўзи мусиқа ва шеъриятга айланиб қолган, фақат буни кўриш учун қалб кўзи сўқир бўлмаслиги керак. Айнан шундай қалб кўзининг соҳиби фарғоналик мусаввир, фотосуратчи ва санъатшунос Мамут Чурлу бўлади. Бугун эътиборингизга унинг йигирма-ўттиз йил аввал олган фотосуратларини тақдим этамиз...”